وصفة البان كيك الأصلية
في هذا المقال راح اتكلم عن وصفة البان كيك الأصلية بالصور وهي طريقة سهلة بدون بيض , وتراها طريقة سرية وفقط قليل من الناس يعرفونها لكن على زوار صفحتي مافيه شيء يغلا 😚 , والطريقة سهلة جداََ و بشرحها بالصور و راح امشي معك خطوة بخطوة حتى يطلع معنا بان كيك لذيذ وهش وطري , نفس اللي بالصورة هذي:
البان كيك يا عزيزي هو صديق المكتئبين, و هم ما سموها مفرحات عن فراغ, لذا لا تستغرب انك تشوف وصفة بان كيك في مدونة واحد مكتئب 😂
مع الوقت و من كثر ما سويته اقدر اقولك ان طريقتي هي افضل طريقة ممكن تسوي فيها بان كيك, خصوصا انها بدون بيض.
شرايك ندخل بالشرح قبل ما ياخذنا الكلام ؟
اوك, بسم الله نبدأ :
مقادير وصفة البان كيك الأصلية :
- كوب ونص طحين متعدد الاستخدامات
- ملعقة طعام بكنج بودر
- ربع ملعقة طعام بكنج صودا
- ربع كوب سكر بودرة (ناعم)
- ربع ملعقة طعام ملح
- كوب وربع حليب دافئ
- ملعقتين طعام زبدة
- زيت
جهز المقادير هذي و خليها قدامك على الطاولة, عشان لما تبدأ بالخطوات تكون العملية سهلة.
هاه جهزت المقادير ؟
اوك, اجل خلنا ننتقل للطريقة.
طريقة عمل البان كيك الأصلية بالصور :
اولاََ :
جهز الصينية او الصحن او الزبدية او او .. الخ . مدري وش تسمونها بهجتكم, المهم انك فهمتها.. صح؟
ثانياََ
نزل الطحين والبكنج بودر والبكنج صودا والسكر والملح في الصينية.
ثالثاََ :
حرك المكونات كويس, لازم كل المكونات تمتزج مع بعضها.
رابعاََ :
نزل الزبدة على الحليب الدافي.
خامساََ :
حرك الزبدة والحليب حتى تذوب الزبدة بالكامل.
سادساََ :
نزل الحليب والزبدة على باقي المكونات بالتدريج وانت تحرك بنفس الوقت, و حركهم كويس حتى تمتزج المكونات من بعضها, لازم مايكون فيه تكتلات.
سابعاََ :
قوام العجينه راح يكون كذا اقرب للسائلة.
ثامناََ :
جهز الصاج او المقلاية وشغل عليها نار متوسطة وحط شوي زيت
تاسعاََ :
امسح الزيت و وزعه على المقلاية او الصاج.
عاشراََ :
استخدم مغرفه عشان تصب العجينه ولو المقلاية او الصاج متزنه ولا فيها ميول راح تاخذ العجينة شكل دائرة مباشرة ولو صار فيه ميول راح تحتاج تحرك المقلاية حتى تضبط معك.
احدى عشر :
اذا بدت العجينه تطلع فقاعات نفس اللي بالشكل تحت وقتها اعرف ان هذا الوقت المناسب عشان تقلبها.
اثنى عشر :
اتركه دقيقه بعد ماتقلبه حتى يتحمر من الجهة الثانية و الوقت بعتمد على مستوى النار بس تقدر تقلب وتتأكد حتى توصل للاحمرار المطلوب وبعدها راح يكون البان كيك جاهز.
تقدر بعد كذا تضيف اللي تشتهي وهذا اقتراحاتي لو حبيت تجربها :
- نوتيلا
- بستاشيو
- عسل
- موز
- فراولة
- هيرشي شوكلاته
- هيرشي كراميل
الى هنا نكون خلصنا الكلام عن وصفة البان كيك الأصلية , وبالهنا والعافيه
بالمناسبة لا يفوتك موضوعي السابق تكلمت فيه عن علاج الاكتئاب من تجربتي يمكن تستفيد منه اذا كنت تعاني من الاكتئاب مثل وضعي 😕
اذا مريت بهذا الموضوع واستفدت منه ياليت تترك تعليق, افرح ترى 😀