وش اسوي اذا ماعندي احد اسولف معه ؟
اعترف اني من عام 2008 م الى الآن 2020 م وانا ماعندي احد اسولف معه وافضفض له اقصد صديق صدوق يفهمني ويشاركني همومي وأفراحي، خلال هذي المدة الطويلة جربت اشياء كثير عشان اخفف من الضيقه والملل، وطريقة وحدة نجحت معي راح اشرحها في هذا المقال. لذا كمل القراءة الى الاخير
كيف كانت البداية ؟
في البدايات كانت هذي المشكلة صعبة بكل مافيها وصارت لي ظروف كنت ابغا احد اسولف معه عنها، من كثر ماكنت اقضي كل الوقت بروحي صرت اسولف مع نفسي كأني مثل مايقولون "نفسيه".
اذكر وضعي كان غير طبيعي اجلس بغرفتي شوي ثم انزل واجلس بالصالة في البيت كم دقيقة ثم يقتلني الملل وارجع لغرفتي واجلس شوي وبرضو يتسلل الملل وارجع انزل للصالة، وهذي كانت حياتي.
ماعندي احد اسولف معه حتى بالمدرسة !
كنت اعرف بعض الشباب بالمدرسة لكن ماكانوا يرحبون بي معهم، علاقتنا كانت مجرد مصالح.
كنت اشوف الشباب يتحمسون لوقت الفسحة عشان يطلعون ويتجمعون كل واحد مع ربعه، الا انا ماعندي احد يسولف معاي.
اصوات ضحكاتهم في الممرات كانت تقتلني وتذكرني اني وحيد، كان قلبي محروق لاني كنت ابغى شخص واحد بس يسمع لي ويحس فيني.
لكن للأسف ماحد فاضي يفكر فيني ويقول لي تعال سولف معنا، خصوصاً اني كنت ارمي نفسي احياناً على بعضهم واحاول اني اعرض صداقتي، لكن غالباً ماكانت تدوم هذي النوعية من الصداقات.
متى عرفت اني اواجة مشكلة حقيقية؟
تقريباً بعد سنتين تعودت على اني عايش لوحدي وماعندي اخويا، لكن بسبب هذا الشيء صارت عندي مشكلة ثانية.
المشكلة هي: اني صرت مكبوت وصارت عندي حساسية زايدة من الكلام لدرجة كنت ابكي لو احد قال لي شيء، وتعرضت لمواقف كثيرة محرجة بسبب هذا الشيء.
هنا عرفت اني اواجهة مشكلة واني مختلف عن الناس.
لكن كان ماعندي احد مليت من كثر ما احاول ومحاولاتي ماتجيب نتيجة وذليت نفسي كثير عشان القى احد اشكي له همي.
محاولاتي الاولى لحل المشكلة
حاولت كثير اغير الواقع الي انا اعيشه، لدرجة افترضت اني لا اجيد التكلم امام الناس وعشان كذا ماحد يبي يكون صديقي.
صرت اشك اني نفسي واني ما اعرف كيف اجيب سوالف وصرت ادخل تويتر ويوتيوب ومنتديات (هذاك الوقت) لاني كنت ابي مواضيع اسولف فيها.
كنت اشوف برامج حوارية او نقاشات عشان اتعلم كيف اسولف مع الناس بشكل طبيعي.
حتى اني صرت اقرأ في مواضيع تتكلم عن "كيف اتكلم بطلاقة" او "علاج قلة الكلام مع الناس" لاني وقتها وصلت ليقين اني مريض وعندي مشكلة تحتاج علاج.
اللحظة الي ادركت فيها اني اخوض هالمعركة لوحدي
اسمحوا لي قبل اكمل استرجع كلامي في مقال سابق:
تكلمت في مقال سابق على هذي المدونة اني ماعندي اصدقاء حقيقيين (<- اضغط هنا لقراءة المقال) وكيف قدرت اتجاوز هذي المشكلة بالاكتفاء الذاتي.
شرحت في هذاك المقال كيف تخطيت مشكلة الوحدة بنجاح وتعلمت كيف اكتفي بنفسي واواجه مشاكلي بنفسي بما اني وحيد ولا عندي احد اعتبره صديق يساندني ويوقف معي.
نرجع لمقالنا هذا:
كان عندي امل ان اخواني راح يكونون موجودين لي في اللحظة الي احتاجهم فيها ، صحيح كانوا مشغولين في حياتهم وعلاقتي معهم اساساً متوتره، لكن بالنهاية حنا اخوان والا؟
في يوم من الايام وصلت لمرحلة يأس شديدة ماقدرت اتخطاها وكنت ابغى احد اتكلم معه، الى درجة اني تواصلت معهم واحد واحد.
لكن الردود كانت مخيبة للظن ولا راح اكثر كلام في هالنقطة لاني بتكلم عن علاقتي مع اخواني بمقال آخر.
المهم بعد الي صار ادركت اني وحدي اخوض هالمعركة بدون دعم، اذكر لما جت هذي الفكرة على بالي صارت يدي ترتعش وقلبي يرجف وعقلي كان يشغله سؤال واحد: هل راح اقضي كل عمري كذا!؟
وش اسوي اذا ماعندي احد اسولف معه (طريقتي في التعامل مع الوحدة)
اذا ما كان عندك احد تسولف معه وتخرج كل الكلام الي بقلبك في هذي الحالة، كل الكلام والقصص والمشاعر الي بداخلك تبدأ تسيطر عليك وعلى افكارك وافعالك ومزاجك، شعور سيء ادري.
تبدأ تفكر في هذي الاشياء كل الوقت وتشغل تفكيرك لانها ما تلقى مخرج بالتالي تلاحظ ان افعالك ومزاجك يتأثرون بهذا الشيء.
لذا الطريقة الي اسويها مو شرط تكون هي الطريقة الصحيحة لكنها ساعدتني كثير وهذا الاهم.
صرت اكتب هذي الاشياء. اي شيء الاحظ انه يتكرر في عقلي او اي افكار تزعجني، مجرد ماتجي هذي الافكار ابدأ اكتبها واكتب اي شيء له علاقة فيها او الاشياء الي ابغى اسويها تجاهها ، كأني اسولف مع اي احد.
طبعاً انت حر بطريقة الكتابة سواء تكتبها في دفتر مذكرات او تنشرها على النت، بالنسبة لي اكتبها في دفتر، وابشركم الحين صار عندي دفاتر.
ما اذكر اني واجهت مشاكل بعد ما صرت اطبق هذي الطريقة، تقريباً تخلصت من هالمشكلة نهائياً.
هل هذا هو الحل النهائي لهذه المشكلة؟
ادري ان هذا الحل قد لا يكون هو الحل الامثل لانه ما يخلص من المشكلة الحقيقية وهي مشكلة الوحدة، لكنه حل ناجح ويعالج المشكلة في اللحظة الي اكون فيها متأزم ومحتاج حل بشكل عاجل.
اعرف انه احيان يكون صعب جداً تكوين صداقات و التقرب للناس ومحاولة بناء علاقات معهم، واعرف اني قد احتاج في يوم من الايام اني احاول معهم مره ثانيه، لكن انا غير مضطر اني اعيش حياة مزريه وصعبة حتى يجي الوقت الي اقدر اكون في صداقات.
لذا كان هذا الحل ضرورة بالنسبة لي حتى انجو بنفسي من الحالة الي كنت فيها والحياة المريرة الي كنت عايشها.
ايضاً احد الاسباب الاخرى الي خلتني استخدم هذي الطريقة، اني ما ابغى اقضي عمري كله اشكي لان ماعندي احد اسولف معه واشارك معه همومي وافضفض له ويكون صديق حقيقي.
الخلاصة والخاتمة
حالياً اهم شيء عندي اني اسوي الشيء الي يساعدني اتخلص من هذي الافكار وهذا الشعور السيء، واتفرغ لحياتي واتعلم كيف ازيد ثقتي بنفسي وكيف اطورها حتى اوصل مرحلة تخلي الناس تتمنى انها تكون صداقات معي وليس العكس.
اذا يهمك تعرف منهجي الي اتخذته في موضوع الثقة بالنفس انصحك تقرأ مقالي ليش ماعندي ثقه بنفسي ؟ | سر تقوية الثقة بالنفس (<- اضغط هنا لقراءة المقال)
بالنهاية اتمنى لكم حياة سعيدة بعيدة عن المشاكل.
اتمنى تكتبون لي في التعليقات آرائكم وتجاربكم