كيف تعايشت مع مشكلة اني انا وحيد ماعندي اصدقاء ؟

انا وحيد ماعندي اصدقاء !

في وقت سابق كنت انا وحيد ماعندي اصدقاء حقيقيين وكنت حزين جداً ونفسيتي تعبانه وفيني هم اغلب الوقت، ماكنت اقدر اتصور الحياة بلا أصدقاء، اما الآن مازلت وحيد بلا اصدقاء لكن عايش من احسن مايكون وفي راحة بال وطمأنينة، اذا كنت تبحث عن نصائح للتعامل مع الوحدة فأنت جيت للمكان الصحيح (كمل هذا المقال للآخر)

كانت تدور في بالي اسألة كثير مثل:

• هل انتهت الصداقة الحقيقية ؟
• ليش ماعندي أصدقاء ؟
• أسباب عدم وجود اصدقاء ؟
  

تعبت من حياتي بسبب هذي الاسألة الي تروح وتجي على بالي كل الوقت.

طبعاً ما يحتاج اقولكم ان هذي الاسألة مالها اجابات بعقلي ومهما بحثت وسألت ما اوصل لنتيجة!

كنت ابحث كثير عن  مواضيع تتكلم عن "تكوين صداقات جديدة" او "كيف تكون اصدقاء عموماً" او كيف أحصل على أصدقاء"، لكن المواضيع الي احصلها تكون ركيكه نظرية وما اقدر اطبقها على ارض الواقع.

المشكلة ما جت على اني وحيد ماعندي أصدقاء بس، بل حتى أقارب مقربين ماعندي، وهذا كان يقتلني كثير،  لان بالعادة القريب ممكن يعوضك عن الصديق.

كنت دايم اشعر بالحرج قدام اهلي لان ماعندي صداقات كأني مقطوع من شجرة!

ما ننسى نظرة المجتمع لـ الشخص قليل الاصدقاء ، خصوصاً القريبين لك والي يكونوا في دائرتك الاجتماعية راح يقتلونك بالنظرات او الهمسات من هنا وهناك.

لكن على الرغم من عدم وجود اصدقاء لدي وكمية الضغط النفسي الي كنت اعيشها، حاولت اتمالك نفسي واحكم عقلي حتى اتخذ القرار الصحيح.

قررت استبدال هذا السؤال "لماذا ليس لدي صديق مقرب ؟" بهذا السؤال "كيف اعيش بدون اصدقاء ؟"

هذا القرار وهذي النظرة غيرت كل شيء اعرفه عن هذي المشكلة، وفتحت لي باب ماكنت اتوقع ينفتح، ومازلت انعم بخيرات هذا القرار الي غير حياتي للأفضل.

كيف اعيش بدون اصدقاء ؟

بعض الناس ما عندهم حظ في الاصدقاء، انا وانت منهم.

اذا كنت فعلاً تعاني من هذي المشكلة، ابيك تعرف انها ماهي نهاية العالم، وفي هذي الحالة لازم تكون انت صديق نفسك.

اعتمد على نفسك وثق فيها وفي قدراتك الي راح تقدر من خلالها تتعامل مع اي شيء يواجهك في حياتك.

انا مريت في نفس هذي المشكلة، كنت اشعر اني وحيد بعدين توصلت لنتيجة مافيه احد يناسبني، بعد كذا ومع الوقت صرت اكثر استقلالية خصوصا بعد مابديت امارس هواياتي واساعد نفسي بدال ما اني اعتمد على احد.

عشان اختصر عليك الموضوع هذا كله، عش حياتك ومارس هواياتك، واذا احتجت انك تغير جو ، اطلع للناس الي تقابلهم بالعادة سواءاً في الشغل او المدرسة او غيره، لكن خل توقعاتك معقوله يعني لاتتوقع انهم راح يوقفون معك او يساعدونك اذا احتجت منهم شيء، لانهم ماراح يسوون هالشيء وبعدها راح يخيب ظنك وترجع تعيد نفس السالفة من جديد.

القاعدة الي لازم تكون مفتح لها ولا تتجاوزها، هي ان تراقب نفسك، وكن حذر وابعد عن المشاكل.

لانك الوحيد الي راح تواجه هذي المشاكل، واذا مشيت على هذي القاعدة ماراح تحتاج لاي احد يساعدك.

هل يجب ان اقضي حياتي بدون اصدقاء ؟

طبعاً حنا بشر واكيد نحتاج الصداقة والمحبة الصادقة مع غيرنا من البشر، لكن كل الي عليك تسويه ان تعطي الناس فرصة بحكمه وبدون توقعات عالية، عشان ما تتحطم اذا اي احد خيب ظنك وصار عكس الي انت متوقعة.

مع الوقت راح يجي الشخص المناسب، وحتى لو تأخر راح تكون انت اكثر استقلالية واعتماد على نفسك بهذي الطريقة من التفكير.

الخلاصة والخاتمة

ياليت عندنا قدرة على قراءة العقول عشان نعرف وش الي يدور في اذهان الناس اذا قابلناهم او حاولنا نسوي صداقات معهم، لكن للأسف ما عندنا هذي القدرة ولازم نتعامل بقدراتنا الي نمتلكها.

اتمنى لك حياة سعيدة سواءاً بدون اصدقاء حقيقيين او معهم.

يارب انك استفدت من هذا المقال، ياليت نورني بتعليقك على هذا المقال