كنت احس اني انسان فاشل وتغيرت حياتي بعد هذي النصيحة

انا بإختصار كنت احس اني انسان فاشل وفاقد الثقة في نفسي و أشعر اني لا اصلح لشيء، ولا سويت اي انجاز في حياتي اقدر افتخر فيه، كل الخطط والاهداف الي نويت اسويها ماقدرت اني التزم وانجزها، عانيت مدة طويله حتى اني في يوم من الايام بالصدفة قرأت نصيحه في احد المواقع العشوائية الي كنت ابحث فيها وبعدها تغيرت حياتي للأفضل.

ركز في هذا المقال لانك لو استوعبت الكلام زين راح تقدر تغير حياتك فعليا في 10 دقائق الي هي مدة قراءتك لهذا المقال، وراح يكون الاخفاق شيء من الماضي.

طبعاً اسباب الفشل كثيرة وتختلف من شخص الى آخر، لكن في هذا المقال بتكلم عن احد اهم هذي الاسباب والي دائما يكون هو السبب الاول في الفشل، والي بإذن الله اذا عالجته راح تتخلص من الفشل.

الي قرأ مقالاتي في هذي المدونة يعرف زين اني ما ابيع الكلام او اخادع، وعشان اكون واقعي خلني اقول لك: لو قرأت هذا المقال ولاتغير شيء في حياتك فهذا يعني ان عندك مشكلة اخرى من مشاكل الفشل الكثيره ولا تقلق كل مشكلة لها حل لكن ابحث اكثر وراح تلقى الحل.

لكن لو تحركت مشاعرك وحسيت ان قلبك فز من الكلام الي بتقرأه في المقال، اعرف ان المشكلة الي راح اتكلم عنها في هذا المقال هي مشلكتك.

كيف اغير حياتي اذا كنت احس اني انسان فاشل ؟

اكسر القيود السلبية الي تمنعك من التحرك وتخليك غير قادر على عمل اي شيء.

الموضوع مايتعلق بمحاولاتك في وضع اهداف او انجاز بعض الامور في حياتك.

الموضوع يتعلق بالتخلص من الاشياء الي تمنعك من تحقيق الحياة الي تبغاها.

لذا اسمح لي اسألك:

وش هذا الشيء الي يخليك تقول " انا فاشل في كل حاجة " او " انا لا استطيع النجاح "ويمنعك من التحرك الى الامام نحو تحقيق اهدافك؟

انتبه من افكارك والقصص الي تصنعها مخيلتك

اسمح لي اجاوب عنك:

الشيء اللي يخليك عاجز عن تحقيق اهدافك هو القصص الي تقولها بينك وبين نفسك بشكل مستمر عن كونك فاشل وما تقدر تحقق الشيء الي تريده.

نعيش في الحياة ونمر بالتجارب الكثيرة ولا نشعر بهذي القصص الي تدمرنا بشكل خفي، خلني اعطيك امثله عن هذي القصص ( اكتب رقم 1 بالردود اذا كنت تردد هذي القصص بينك وبين نفسك 😉 )

المثال الاول: انا ما اقدر اخفف وزني لاني ما راح اقدر التزم بالتمرين او الحمية.
المثال الثاني: انا ما اقدر اكسب المال لان الناس يقولون انه صعب.
المثال الثالث: انا ما اقدر اطور نفسي اكثر من كذا لان الحياة صعبة ولاني ماراح اقدر اتجاوز المستوى الي انا فيه الآن.
المثال الرابع: انا فاشل في الدراسة وما اقدر اذاكر المادة الفلانيه لان فهمي ضعيف.
المثال الخامس: انا غير موفق في حياتي لاني لا أستحق الحياة.
المثال السادس: انا فاشل في عملي لان إنسان ضعيف ولست إنسان قوي ومبتكر.

طبعا الامثلة كثيره والعقل يقدر يجيب قصص مثل هذي بطرق وسيناريوهات مختلفة.

اذا كنت تقول لنفسك مثل هذي القصص اعرف ان هذا هو سبب عجزك وعشان كذا انت متعلق ماتقدر تمضي بحياتك او تحقق احلامك.

خلني اقولك كيف هذا الشيء راح يؤثر عليك: هذي الافكار عبارة عن قصص يستنتجها عقلك بناء على خيال ومعلومات سابقه سمعتها او مرت عليك، لكنها ليس بالضرورة تنطبق عليك لذا تعتبر استنتاجات ضعيفه وغير صحيحه، الآن لما تقول لنفسك مثل هذي القصص بشكل مستمر فأنت في هذي الحاله تحاول تدعم استنتاجات عقلك الضعيفه الغير صحيحه وتخليها معقوله ثم تصدقها بالاخير.

اذا صدقتها اعتبر نفسك وقعت في الفخ، لانك فعليا قاعد تعلم نفسك كيف تكون فاشل! بالتالي طبيعي ترجع وتقول حاسس إني انسان فاشل.

صدقني مهما حاولت تتشجع وتزيد اعتمادك على نفسك او تكتب اهدافك ما راح تقدر تهرب من الفخ الي انت فيه ما دمت تسمع الى هذي القصص وتصدقها.

الخطوة الاولى في طريق النجاح

كل الناس حتى الناجحين منهم تمر عليهم هذي المشكلة، لان هذي طريقة عمل العقل ولا نقدر نسوي شيء عشان نوقف مثل هذي الافكار والقصص.

لكن اذا قدرنا نغير طريقة تعاملنا وتفسيرنا لمثل هذي القصص و كنا اكثر ثقه بالنفس وأكثر اصرار ان نستمر ونحقق اهدافنا راح نقدر نصنع الحياة الي نبغاها.

اما اذا استمريت بتصديق هذي القصص السيئة مستقبلاً ما راح تقدر تطلع نفسك من دوامة الفشل.

افضل شيء تقدر تسويه الآن خلال 10 دقائق التالية: ان تكتب هذي القصص الي خلتك تعتقد انك شخص فاشل كل هذي المدة الطويلة عشان تحصرها وتعرفها زين بالتالي تتجاهلها ولا تتفاعل معها اذا جت على بالك.

تأمل هذي الافكار في حقيقتها راح تكتشف انها قصص واهيه مالها اساس من الصحة، تمت صناعتها في مخيلتك عشان تبقى مكانك بدون انجازات.

انتهيت من المقال اتمنى من كل قلبي انك استفدت، حاولت اني اوضح الفكرة لكن لو شعرت انك ما استوعبت اكتب لي في الردود وبكون مبسوط اني اشرح و اوضح اكثر.

اذا قرأت هذا المقال بالكامل واعجبك: اقترح عليك هذا المقال على هذي المدونة بعنوان ليش ماعندي ثقة بنفسي | سر تقوية الثقة بالنفس ، اتوقع انه راح يفيدك في حياتك عموماً وما راح تطلع منه بدون فائدة.

لاتحرموني من تعليقاتكم لانها تفرحني وتشجعني اكتب اكثر.