وصلت لمرحلة اني مليت من كل شيء حولي حتى عرفت السبب

وصلت لمرحلة اني مليت من كل شيء حولي حتى عرفت السبب

الملل قد يكون مرحلة مؤقتة "تجي وتروح" وهو شيء طبيعي، واحياناً يكون شيء مفيد  لانه يرشدك اذا كنت تحتاج تجدد النشاطات الي تمارسها.

انا مريت بهذي الحالة وكنت احس اني احترق  في كل لحظة، اذا سألوني اهلي: وش الي تعاني منه بالضبط ؟ اقولهم مليت من كل شيء حولي او تعبت من كل شي مليت ، لكن ما كانوا يتصورون الالم الي اعيشة، وكانوا يستخفون بكلامي ويقولون تعوذ من ابليس وراح تتحسن حالتك.

ساعات وساعات قضيتها وانا ابحث عن حل لهذي المشكلة في قوقل واليوتيوب، لكن كل الي كنت احصله مجرد ناس يشتكون عن نفس الحالة لكن بدون حلول حتى كرهت كل شي بحياتي.

طبعاً لا تفهموني غلط اكيد اني فرحت لما عرفت انه فيه ناس غيري يشتكون من نفس الشيء الي اعاني منه واني ماعدت وحيد، لكن الي كنت ابحث عنه هو هذا الحل السحري الي راح يغير حياتي ويرجع لي الشغف بالاشياء الي احبها.

عانيت وقت طويل حتى صرت الاحظ تصرفاتي والاشياء من حولي الى ان قدرت اصنف الملل والاسباب الي تلعب دور فيه وراح اسردها في هذا المقال لعل احد يستفيد منها.

اصناف الملل من تجربتي عندما مليت من كل شيء حولي

1. ملل عابر 

   اذا كان الملل الي تعاني منه مجرد ملل بسيط او انك استغرقت وقت طويل تمارس هوايات معينه وفجأة حسيت بالملل، لا تفزع ولا تخاف كلها وقت بسيط ويختفي، هذا حال الحياة 😇 بعض الايام جميلة وبعضها سيئة.
   طبعاً اذا حسيت بالملل اعتبرها فرصة انك تطلع وتغير جو او تتواصل مع صديق او ترتب غرفتك او تسوي الاشياء الي كنت تسوفها وماتسويها في وقتها.

2. ملل بسبب الاكتئاب

   اذا كان الملل الي تعاني منه مستمر معك لفترة طويله مع شعور بالحزن 😟 فهذا مؤشر ان عندك بدايات اكتئاب، بالواقع هذي احد علامات الاكتئاب الملحوظة.
   
   في هذي الحالة انصحك تزور طبيب نفسي عشان يشخص التشخيص المناسب وتلقى المساعدة الي تحتاجها.
   
   اذا حبيت تقرأ عن حلول للأكتئاب لا تفوتك المقالات الي كتبتها عن هذا الموضوع ( علاج الاكتئاب من تجربتي ، هل يزول الاكتئاب بدون علاج) راح تستفيد كثير كثير 👌 ، تعبت كثير على هذي المواضيع وكتبت فيها معلومات راح تغير مفهومك للإكتئاب وتساعدك على تجاوزه او التأقلم معه.

3. الانتظار السلبي

   الانتظار السلبي اقصد فيها انك تنتظر شيء معين يجي ويطلعك من حالة الملل، بدلا من انك تقوم وتبحث عن هذا الشيء وتسويه.
   جلوسك كذا 🙇 وتصفحك في تويتر وانتظارك لهذا الشيء الي راح يجي يثيرك ويطلعك من حالة الملل مو هو الطريقة الصحيحة للتعامل مع هذي الحالة، كلما اسرعت وحاولت انك تبحث عن اشياء تثيرك وتسويها راح تلقى نفسك ناسي انك كنت تشعر بالملل.
   تقدر مثلا تعزم اصحابك او تسافر او تسوي حفلة لأهلك بالبيت 🎉، المقصد حاول تسوي شيء جديد في كل مره حتى تلقى الشيء الي يثيرك اكثر ويرجع لك الحياة الي تريدها.

4. قلة التعرض للتحديات

   احد الاسباب الي قد تكون تشعر بالملل بسببها ان يكون لديك "عقل فضولي" وبنفس الوقت جالس تعيد حياتك مراراً وتكراراً، العقل الفضولي هبه من الله وليس مشكلة لكن لازم تعرف كيف تستخدمة.
   
   العقل الفضولي دائما يستكشف المجهول 🔎 ويتعطش للتحديات ، لازم تعطيه هذا الشيء وبنفس الوقت تستفيد من هذي القدرة الخارقة عندك، غيرك يتعب عشان يتعلم اشياء جديدة وانت عقلك مبرمج على تعلم اشياء جديدة.
   
   عشان اقرب لك الفكرة: تعرف شعور الطالب لما يرسب في المدرسة اكثر من مره في نفس السنه الدراسية، راح يوصل لمرحلة يمل فيها من المناهج 📕 لانها صارت ماتحرك ذهنه بسبب انه عادها اكثر من مره.
   
   في هذي الحالة الي تحتاجه انك تزود جرعة التحديات في حياتك 💪 ، مثلاً اذا كان معك شهادة بكالوروس قدم على الماجستير، اذا كنت تشتغل في وظيفة معينة اطلب تغيير منصبك لمكان اصعب، حتى لو كنت تلعب لعبة في البلايستيشن مثلاً حاول تغيرها للعبة اصعب. المهم انت فهمت الفكرة الآن طبقها على حياتك.
   هذي النقطة اختصرها عمر العريفي في هذا الفيديو:
    
   

الخاتمة والخلاصة

انا وصلت لمرحة اني مليت من كل شيء حولي بسبب الاكتئاب اذا يهمك امري 😢 ، غير كذا حاول تقرأ الاصناف الاربعة واعرف مكانك وين منهم وبعدها ابدأ بتغيير نفسك.

ان شاء الله راح تتحسن الاوضاع للأفضل 👆 وخلك متفائل دايماً ولاتنسى ان كل مشكلة لها حل.

ياليت تشرفني وتفرحني بتعليقك على هذا المقال 💖