احس بضيقة ودي ابكي
الحياة صعبة جداً واتوقع كلنا نتفق على هذا الشيء، لذا طبيعي ان الواحد يشعر بضيق من وقت لوقت لان كثير مشاعر تختلط بنفس الوقت مثل خوف وهلع وقلق حتى يتوقف العقل عن العمل وما عاد يكون عند الواحد قدرة انه يتفائل، انا كتبت هذا المقال لاني احس بضيقة ودي ابكي وحاب افضفض معك واعطي بعض الحلول عشان نروح عن انفسنا في مثل هذي الاوقات العصيبة.
خلني اتكلم عن الاشياء الي تخليني ادخل في هذي الحالة (اكتب لي في الردود اذا كانت نفسها تصير معك) وبعدها ندخل بالحلول.
اسباب الشعور بالضيقة
الخوف بدون سبب
مرات احس بخوف ولا ادري من وش خايف منه بالضبط!؟ وهذي الحالة تجي لي فجأه، يعني اكون جالس في أمان الله وبدون مقدمات احس بنفس الشعور الي يجي الواحد لما يدخل مكان مهجور.
يعني انت في مكان ما تدري وش بيطلع لك لذا الان انت خايف وهلع من شيء مجهول ماتدري وش هو!
هذي المشكلة اتعبتني كثير، حياتي تعطلت وضيعت فرص كثير بسبب هذي المشكلة 😭
طبعاً هذي الحالة تجلس معي ساعات وبعد ما تفك تنزل علي الضيقه وتجلس معي ايضا لمدة ساعات، طبعاً ما احكيلك عن صعوبة هذي الساعات لاني اعزل نفسي ولا افكر اني اقابل احد وعبرتي تكون قريبة جداً 😟 اي شيء ممكن يبكيني.
مشاكل الهضم
آآه وش اقول وش اخلي عن علاقة مشاكل الهضم مع المزاج السيئ👎، حتى بعد بحث مطول اكتشفت ان الامعاء مرتبطة بالدماغ مباشره وتحتوي على عدد كبير من النهايات العصبيه.
لذا اي مشكلة تصير في الجهاز الهضمي راح يكون تأثيرها على الدماغ اسرع مما تتصور، و أي اضطراب يصير بالدماغ راح يأثر على مزاجك.
مع الوقت لاحظت انواع الاكل الي تأثر على نفسيتي ومنها مثلاً الحليب, البيض، واللحم (الكميات الكبيره فقط)، اذا تبي نصيحتي حاول تكتب يوميات وتسجل الاشياء الي تاكلها وتأثيرها على نفسيتك حتى يكون عندك فكره كامله عن الاكلات الي تسبب لك مشاكل.
طبعا ناهيك عن اذا كان عندك قولون عصبي 😓 الوضع بيكون صعب جدا اذا ثار القولون وخذ لك ضيقه وتعب نفسي.
اذكر احد المرات اكلت وجبه وكثرت منها، وبعدها بيوم صرت ما احس بأي مشاعر الا الحزن وصحت بشكل غريب بدون توقف لدرجة كنت احس اني ميت لكن جسمي يتحرك، وعشان اتأكد اذا انا حي او ميت رحت اتروش بمويه بارده وما حسيت فيها! ما قمت بعدها الا بالمستشفى.
الاكتئاب والقلق
مايحتاج اعرفك على اعداء المزاج، الاكتئاب والقلق.
طبعا هذي حالات طبيه نفسيه اذا صار انك تعاني منهم حاول تروح لطبيب نفسي وحط حد لمعاناتك معهم، بالنسبة للاكتئاب كتبت عنه مقالات في هذي المدونة وتكلمت في احد المقالات عن تجربتي في علاج الاكتئاب والمقال الآخر هل يزول الاكتئاب بدون علاج؟ وكيف استطيع ذلك؟
ما اخفيك عن معاناتي معهم خصوصا الاكتئاب، يجي على شكل نوبات لكن اذا جاء يقلب الدنيا علي فوق تحت وكل الاشياء الي استمتع فيها وتبسطني تصير تافهه ولا عاد تجذبني 💔
افقد الامل في كل شيء واعزل نفسي عن الناس، الشيء الوحيد الي اقدر اسويه هو البكاء شعور الدموع وهي تمشي على خدي يواسيني واجلس على هذي الحالة حتى انام، وباليوم التالي انا وحظي يمكن اكون تحسنت ويمكن ما يتغير شيء.
ضغوطات العمل
اكثر سبب يجهله الناس، اذا كان تشعر بضيقه من وقت لوقت فكر في وظيفتك اذا كنت موظف او في مدرستك او جامعتك اذا كنت طالب، واسأل نفسك هل انت مرتاح فيها او لا؟
ضغوطات العمل مصيبه 😫 وما ابالغ لو قلت لك انها ممكن حتى تكون سبب في كل الاسباب الثلاثة السابقه يعني تكون سبب في الخوف بدون سبب + مشاكل الهضم + الاكتئاب والقلق.
تأثيرها غير طبيعي على صحتك، كثير ناس يعانون ولا يدرون ان هذا هو الشيء الي قاعد يقتلهم كل يوم.
بالنسبة لي عانيت من هذا الشيء كثير لدرجة اني اجهز لمقال خاص عن معانتي مع هذا الموضوع، وغالبا ضغوطات العمل تتجمع و تنفجر مره وحده.
اذكر اني في بداية الوظيفة لاحظت الضغط لكن كنت اصبر وحسيت اني مسيطر على الامور، لكن في يوم من الايام قمت من النوم ما اقدر اتحرك من الهم والضيقة كان شعور اليم ولا اتمناه لأعدائي.
طبعا بتكلم عن هذا الموضوع بالتفصيل وبشرح كيف عرفت ان هذا الشيء صار لي بسبب ضغوط العمل في المقال الي قاعد اجهزة لذا اذا تحب تقرأ هذا المقال احرص انك تضيف هذي المدونة عندك بالمفضله وارجع لها بعد فتره اكون خلصت من المقال.
كيف اتخلص من الضيقة ورغبة بالبكاء ؟
الحلول كثيرة والي عليك انك تقلب في هذي الحلول حتى ترسى لك على بر، احياناً تضبط معك حلول لفترة معينه ثم تفقد تأثيرها عليك بعدها تبحث عن حلول بديلة وهكذا.
اعرف انك اذا كنت تمر في مثل هذي الحالة مايكون لك نفس تسوي شيء او حتى يمكن ما يجذبك شيء، لكن خل شعارك في هذي المرحلة "التجربة ماتضر"، مهما حاول عقلك يقنعك ان هذي الاشياء مو كويسه خلك اكثر اصرار انك تجربها لانه مثل ماقلنا التجربه ماتضر.
راح اتكلم عن بعض الحلول الي تضبط معي خصوصا بالفتره الاخيره:
متابعة مقاطع مريحه او مضحكة في اليوتيوب
كثير من الفيديوهات في اليوتيوب لها طابع مريح او تكون مضحكة، ما اقدر اوصف لك كمية الراحة الي احسها اذا شفت هذي المقاطع وتطلعني من حالتي وقتها مهما كانت حالتي النفسيه سيئة.
احياناً انسى نفسي وانا اتابع هذي الفيديوهات حتى تتحسن حالتي، هذا هو المطلوب والا كيف؟ 😁
بقترح لكم عدد من القنوات الي تطرح مثل هذي الفيديوهات:
- قناة لرجل كندي يعيش في الغابه ويصور حياته وهو يبني ويصيد ويتكيف مع هذا النوع من الحياة (طبعاً ماتحتاج انك تعرف انجليزي حتى تتابع القناة لان فيديوهاته صامته) وهذي القناة My Self Reliance
- قناة لشرق اسيويين يبنون مباني وغرف ومسابح تحت الارض بأشكال جميل ويصورون مغامراتهم (ايضاً ماتحتاج لغة لان الفيديوهات صامته) وهذي القناة Primitive Unique Tool
- قناة نشر فيديوهات مضحكه، طبعا هذي القناة ميزتها ان الفيديوهات فيها حقيقية مو التمثيل وثقالة الدم الي منتشره هذي الايام، وراح تنسى نفسك وانت تتابع، هذي القناة America's Funniest Home Videos
جرب تطبخ لنفسك او لأهلك
رتب غرفتك
ارقص على اغنية تحبها
الخاتمه والخلاصة
خلصت هذا المقال والي فضفضت فيه عن الحالة الي فيها احس بضيقة ودي ابكي ، وتكلمت عن عدة حلول عشان تتجاوز هي الحالة وتطلع منها بدون ماتضر نفسك.
دائما تذكر انك انت الوحيد الي قدر يطلعك من هذي الحالة، مهما حاولوا الناس من حولك ماراح تتحسن الا اذا تحسنت داخلياً.
لذا خلك دائما ايجابي وتذكر قاعدتنا الشهيرة "التجربة ماتضر".
اكتب لي في الردود وفضفض لي وانا بقرأ كلامك، و اكتب لي بعد اذا جربت هذي الحلول وكيف اثرت عليك واذا عندك حلول غير اكتبها ايضا حتى تعم الفائدة.