وش اسوي اذا حسيت ان تركيزي ضعيف ؟ | حلول سريعه وممتعه

 وش اسوي اذا حسيت ان تركيزي ضعيف؟

مرحبا،، ممم نسيت وش كنت بقول!؟ >> هذا الموقف ماهو غريب عليك صح ؟ اذا مريت بهذا الموقف وتعبت من تركيزك الضعيف،، خلك معي في هذا المقال بتكلم عن العادات الي اسويها اذا حسيت ان تركيزي ضعيف، وتساعدني في تحسين تركيزي بشكل رهيب.

اذا اعجبك المقال اكتب لي تعليقك في الاخير

اول شيء اسمح لي اطلب منك طلب: ارجوك وقف عن جلد ذاتك، يكفي انتقاد لنفسك يعني كل السنوات الي فاتت وانت تتكلم على نفسك بهذا الكلام السلبي ولا زالت المشكلة موجودة معك، اتوقع كذا الموضوع صار واضح ان جلد الذات ليس هو الحل؟

ادري ان المشكلة صعب تتجاهلها هذا غير انك تشعر بالراحة اذا شكيت لأي احد، لكن وش رأيك لو اقول لك الحل بيدك انت وليس بيد الناس، لذا وقف كل هذي التصرفات وساعد نفسك بنفسك.

انا ابتدت معي المشكلة تقريبا لما كان عمري 14 سنه، لاحظت اني استسلم في اشياء كثير خصوصا الاشياء الي تحتاج مجهود ذهني.

المشكلة اني كنت اعاني من الاكتئاب وهذا زاد المشكلة سوءاً، ما كنت اشعر بأي حافز اني ابذل ولو مجهود بسيط في التفكير.

لاحظت اني مختلف عن باقي الاطفال اللي بعمري، لان هذي العادة غيرت اشياء كثير في تصرفاتي.

مثلاً: 

• كنت احب العاب الفيديو خصوصا المعقدة منها والي تحتاج تفكير، لكن بعد هالحالة صرت العب العاب بسيطة ماتحتاج ادنى مجهود بالنسبة للتفكير.
• كنت احب العب كورة القدم وكثير من زملائي كانوا يمدحون لعبي، لكن بعدما تغيرت صرت ما اقدر اركز طول اللعبة وافقد تركيزي وتدهور مستوى لعبي، لدرجة بعدما كنت لاعب مرغوب صرت منبوذ.
• كنت اتكلم بطلاقة واسولف بشكل سلس، لكن بعد اللي صار صرت اتعتع بالكلام واتكلم بشكل بطيء واحياناً اشرد وانا اتكلم او اوقف فجأة لاني نسيت وش كنت اتكلم عنه.
• كنت استمتع بمتابعة المسلسلات والافلام، لكن بعد هالحالة صرت ما اقدر استوعب وانسى الاحداث واسماء الشخصيات.
• كنت في المدرسة افهم الدروس ولا احتاج اني اراجعها في البيت، لكن بعد هالمشكلة صرت ما افهم شيء في وقت الدرس ولازم اذا رجعت استرجع دروسي واحاول افهمها من جديد.
• كنت مستمع جيد وافهم كلام الشخص الي يسولف علي، لكن بعد الي صار صرت ما افهم ولازم اطلب منه يعيد كلامه اكثر من مره واحياناً انحرج واسوي نفسي فاهم وانا مافهمت.

كثير كثير امثلة اقدر اكتب عنها الى بكرى، لكن للاختصار خلونا ندخل بالزبدة والي هي كيف احسن من تركيزي.

طبعاً الموضوع معقد ومتشعب لان اسبابه مختلفه، حسب بحثي قد يكون هناك عدة اسباب لهذي المشكلة مثل لما تكون تعاني من الضغوط او الاكتئاب او القلق وغيرها من المشاكل الي تؤثر بشكل مباشر على عقلك. (هذي لازم تستشير شخص متخصص هو الي يفيدك)

من الاسباب الاخرى لهذي المشكلة هو التعود على عدم التركيز، يعني في مرحلة من حياتك جربت انك ما تركز واعجبك الموضوع لانه مريح، ليش اشيل هم واركز على المدرس الي يشرح وانا اقدر اسبح بخيالي واتخيل كل الاشياء الجميلة الي اتمناها.

يعني الموضوع اقرب مايكون للادمان، انت مدمن على عدم التركيز. عاجبك انك ما تحتاج تبذل مجهود عشان تفهم الي صاير حولك، وتظل تعيده وتعيده حتى يتعود عقلك على الخمول.

الآن بعدما عرفنا السبب نقدر نقول الحل واضح، انت عودت عقلك على الخمول كل السنوات الي فاتت، لذا لازم انك ترجع تصحيه وتحاول تمرنه وترجه له نشاطه.

الامر المهم هنا ان المشكلة هذي تراكمت بعد سنوات، لذا لازم تعطي عقلك فرصه عشان ينتعش وترجع له مرونته بشكل تدريجي ولا تعرضه لاي ضغط مفاجئ لان النتيجة قد تكون عكسية.

طبعاً الحل ببساطة هو عمل تمارين عقلية تساعدك على تنشيط عقلك واعادته لحالة الاستعداد بدلاً من حالة الخمول.

التمارين كثيرة لو تكتب في قوقل تمارين ذهنية راح تلقى افكار كثيرة لهذي التمارين. 

الهدف من هذي التمارين انك تمارس اي نشاط بحيث ان هذا النشاط يتطلب انك تركز طول فترة هذا النشاط، لذا من الافضل ان يكون هذا النشاط ذهني من الدرجة الاولى.

طبعاً دائما ابدأ بممارسة هذا التمرين لوقت قصير حتى تتفوق فيه، بعدها تقدر تزيد المدة تدريجياً.

من التمارين الي انا استخدمتها شخصياً ولازلت استخدمها :

 قراءة المقالات

قراءة المقالات طريقة رهيبة وتتطلب تركيز على الكلام المكتوب، طبعاً قلت مقالات لانها بالغالب تكون قصيرة ولا تتعبك او تحملك فوق طاقتك، عكس الكتب الطويلة الي دائماً ما تكون مملة وقد تتحطم ولاتكمل التمرين بسببها.

تقدر في البداية تقرأ مقال واحد في اليوم لمدة اسبوع، والاسبوع التالي تقدر تقرأ مقالين وهكذا...

طبعا دائماً اقرأ مقالات في الموضوعات الي انت تحبها وعندك فضول لها، من المدونات الجميلة والمنوعه الي احب اقرأ فيها شخصياً: مدونة موضوع و مدونة سطور

التأمل العميق

هذي الطريقة غنية عن التعريف وتجيب نتيجة حتى لو كنت تعاني من القلق، لان تساعد على تهدئة عقلك وترتب افكارك المبعثرة الي اساسا هي السبب في عدم تركيزك.

وطريقتها بكل سهولة انك تجلس بالطريقة الي تريحك في مكان هادئ وتغمض عيونك وتركز على انفاسك، اسمع انفاسك وهي تدخل تطلع من جسمك لمدة دقيقة كل يوم حتى اذا تشعر انك مسيطر على افكارك خلال هذي الدقيقه، بعدها تقدر تمدد الوقت الى دقيقتين وهكذا حتى توصل الى اكثر من كذا.

بالنسبة لي الآن اقدر اسويها لمدة 15 دقيقة، وتفرق معي كثير صرت احس براحة وتركيز افضل من قبل.

حل الكلمات المتقاطعة

الكلمات المتقاطعة لعبة غنية عن التعريف، غير انها تساعدك في تنمية حصيلتك اللغوية بالكلمات راح تكون طريقة رائعة لتمرين ذهنك على التركيز.

هذي الطريقة بديت اسويها من وقت قريب، صراحة ندمان اني ماسويتها من قبل لان نتيجتها مبهرة.

من المواقع الي احبها اذا بغيت امارس هذي اللعبة هو هذا الموقع واحة الانترنت، الموقع يحتوي على اكثر من 2000 شبكة كلمات متقاطعة.

التمرين هذا ممتع وتقدر تمارسة كل الوقت، لكن نصيحتي ان تحاول تبدأ بشكل تدريجي حتى ما تمل منه وتوقف بعد مدة قليله.

الافضل انك تخصص لك وقت يومي وتسميه " وقت الكلمات المتقاطعة " ، طبعا ضروري انك تحترم هذا الوقت، وتخليه مخصص لهذا التمرين ولا تفوته مهما كانت الاسباب.

الخلاصة والخاتمة

مشكلة ضعف التركيز دائماً تكون تراكمية، والافضل مع هذا النوع من المشاكل ان يكون الحل تدريجي وتراكمي. يعني مثل ما بدأت تنتهي.

هذا غير انه من الصعب ان تغير شيء تكون خلال سنوات في مدة بسيطة.

لذا حاول انك تكون صبور لان هذا الحل يحتاج وقت حتى تلاحظ تأثيره على تركيزك.

التمارين الي اضفتها هي التمارين الي انا جربتها ونفعت معي، لكن الانترنت في الكثير والكثير من التمارين.

لذا لا تجبر نفسك اذا ما اعجبتك هذي التمارين، لان الاختيارات كثيرة اكتب في قوقل "تمارين ذهنية" وراح تلقى شيء يسرك.

طبعاً لازلت مستمر في هذي التمارين واحياناً اضعف لكن مجرد اني احس ان تركيزي ضعيف ارجع وامارسها وصراحه ساعدتني كثير.

اتمنى لكم ايام سعيدة مليئة بالتركيز.. اترك لي رد او تعليق من فضلك

في هذي المدونة اتكلم عن مواضيع كثير مثل الاكتئاب والقلق والثقه بالنفس.. اضغط هنا اذا حبيت تقرأ اكثر.