تبغى تعرف كيف تغيرت حياتي للأفضل؟ [ إليك تجربتي ]

كيف تغيرت حياتي للافضل من تجربتي

مرحبا بزوار مدونتي البسيطة. في هذا المقال بتكلم عن تجربتي الي فيها تغيرت حياتي للافضل بعدما غيرت طريقة تفكيري، راح اتكلم عن حياتي كيف كانت وكيف تحسنت و الشيء الي انا سويته عشان اغيرها حتى تستفيدون.

قبل نبدأ اطلب منك ان تترك تعليق بالاسفل بعد ما تنتهي من قراءة المقال.

كيف كانت حياتي:

كنت واحد دائماً افكر بالماضي او بالمستقبل.

غالباً اشعر بنوعين من المشاعر ندم او خوف.

• ندم على اشياء صارت بالماضي وشيء من الحسرة على اشياء صارت وانتهت، الي احياناً اتألم مجرد ما اتذكرها.
• خوف من المستقبل ورهبة من الايام الجاية والي راح تجيبه معها، هذا الشعور ايضاً يقتلني لان المستقبل مجهول ولايعلم الغيب الا الله لكن عقلي ما يوقف عن اختراع قصص مستقبلية مخيفة.

لذا كنت غالباً سارح وقليل الكلام، كنت انسى اي شيء لدرجة اني اذا كنت اتكلم انسى وش انا اتكلم عنه.

كنت انسى وين حطيت المفاتيح، او اروح للبقالة واذا وصلت انسى لي انا جاي اصلاً.

كل الوقت احس بخمول وتعب و روحي مرهقة من التفكير الزائد، طول اليوم اتسدح واقلب بالجوال ولا عندي اي دافع اني اطلع او اسوي اي شيء.

كنت اشوف الناس واستغرب ليش مره ينبسطون على اشياء بسيطه وش المميز فيها يعني عشان يفرحون كل هذا الفرح.

اذكر مره دخلت في نقاش مع واحد: 

كان مبسوط عشان الجو كان غيم ومطر، فـ كنت اقول له وش مناسبة الفرح هذا ؟ ترى مشاكلك موجودة وماراح تروح سواء كان الجو غيم او صحو! .. احسن شيء انه ماعطاني وجه، راح وتركني اتحلطم.

هذا غير طلعات البر او المولات او المهرجانات الي انتشرت بالفترة الاخيرة تقريبا بكل محافظات المملكة، كنت اشوفها اشياء تافهة ولا تستحق كل هالاقبال.

كيف قدرت اغير طريقة تفكيري واحسن من حياتي؟

بعد جلسات تفكير عميق وبحث طويل طلعت بخلاصة من كل اللي قاعد يصير معي، ان مشكلتي هي طريقة تفكيري الخاطئة.

لاحظت اني دائما اكون متواجد في زمنين:

• الزمن الماضي: وهذا يرتبط بمشاعر الندم والحيرة
• الزمن المستقبلي: وهذا يرتبط بمشاعر الخوف والرهبة

طبعاً بعد ما لاحظت هذا الشيء صرت اسأل نفسي ليش انا اعيش بالماضي او المستقبل؟

فجأة كذا في احد الايام خطر على بالي شيء كنت ناسية وهو: (الزمن الحاضر)

كنت مشغول جداً بحالتي السيئة لدرجة نسيت زمن الحاضر!

بعدما تذكرت الزمن الحاضر ودخل في المعادلة رجع كل شيء بمكانه وصارت الامور واضحة لي، وقدرت اعرف موطن الخلل في طريقة تفكيري.

الزمن الحاضر هو الوحيد الي اقدر اسيطر عليه، لكن من تعاستي كنت مشغل نفسي بالماضي والمستقبل الي مالي سيطرة عليهم.

الآن عرفت اني لازم اعيش في اللحظة الحالية، لكن كيف اقدر اتخلص من نمط التفكير القديم لان عقلي ما تعود على هالشيء.

كل ما حاولت اسحب تفكيري للحظة الحالية بعد ثواني القى نفسي افكر بالماضي او المستقبل.

كانت مشكلة حقيقية وما كنت اتوقع ان طريقة تفكيري القديمة صارت عادة صعب اتخلص منها.

لكن الشيء الوحيد الي كنت اعرفه اني ما راح استسلم، خصوصاً بعد ماعرفت السبب الي معذبني كل الفترة الماضية.

دائماً يقولون اذا تعرفت على سبب مشكلتك فأنت قطعت نصف الطريق عشان تحلها، وهذا الي صار معي بعد ماعرفت مشكلتي: اني ما اعيش في الوقت الحاضر فـ صرت ابحث عن طرق تساعدني اني اعيش في الحاضر.

لقيت تمارين كثيرة وصرت امارسها بشكل يومي، ومن هذي التمارين:

تمرين ملاحظة التنفس:

هذا التمرين بسيط جدا لكن فائدة عظيمة، وطريقته ببساطة: 

تجلس جلسة مريحة وتغمض عيونك وتنتفس بشكل طبيعي، لكن خلال الجلسة ركز على عملية التنفس حاول تسمع انفاسك وتتخيل الهواء وهو يدخل رئتيك (شهيق) ويطلع منها (زفير).

كل ما ركزت اكثر على انفاسك راح توقف تفكير في اي شيء ثاني وهذا هو المطلوب، وكل ما سرح تفكيرك ارجع مره ثانيه وركز على انفاسك.

في البداية يمكن تشعر بعدم الارتياح لكن تقدر تبدأ بشكل تدريجي لين تبدأ تتعود عليه، في البداية مارس هذ التمرين لمدة 5 دقائق يومياً لمدة اسبوع بعد كذا تقدر تزيد الى 10 دقائق وهكذا حتى توصل الى 15 او 20 دقيقة.

تمرين تأمل الطبيعة

احب هذا التمرين بشكل ماتتصورونه، خصوصا اني من التمرين الاول حسيت بفرق كبير.

بسبب هذا التمرين صرت اشوف جمالية الاشياء من حولي وروعتها، تغيرت نظرتي لكل شيء مثلاً:

كنت اشوف الاشجار على انها مكان تجمع الغبار ومصدر حساسية، الآن اشوفها مصدر للاكسجين ومتعة بصرية.

كنت اشوف الحشرات على انها كائنات قذرة مالها اي اهمية، الان اشوفها جزء يكمل عالمنا و وجودها مهم لدورة الحياة.

والكثير الكثير من الامثلة.

طريقة هذا التمرين:

تختار وقت مناسب يكون في النهار والافضل ان تحدد مسبقاً ثلاث ايام في الاسبوع (اكثر او اقل حسب قدرتك)، خلال هذا الوقت تطلع لأي مكان حولك في طبيعة ولو كنت تسكن في مدينة تقدر تروح لأي حديقة قريبة عندك.

خلال هذا الوقت حاول تركز على حركة الكون من حولك، لاحظ اشعة الشمس وكيف تسقط على اوراق الشجر، لاحظ الغيوم باشكالها العشوائية كيف تتحرك، ناظر بالارض وشف الحشرات كيف تتفاعل مع بعضها، استشعر الهواء لما يلامس جسمك.

طبعاً تقدر تجلس المدة الي تناسبك، لكن مهم انك تتذكر ان هذي الفترة ليست للتفكير بالماضي او المستقبل، كل ماركزت على الاشياء من حولك كلما كان سهل عليك انك تعيش اللحظة.

ــــــــــ

مع الاستمرارية في هذي التمارين راح تلاحظ انك تعيش في حياة مختلفة، حياة جميلة تقدر تسيطر عليها بدون خوف او ندم.

راح تلاحظ انك اكثر تقدير للحظات الجميلة، اقل تعب، اكثر اقبال على الحياة.

اكتب تعليقك على هذا المقال بالاسفل، يهمني اعرف تعليقاتكم وآرائكم وتجاربكم.