ليش احس مالي قيمة ؟ وكيف اقدر استعيد قيمتي؟
تمر علي أحيان احس فيها ان مالي قيمة، وهذا من تجربه هو اقبح وابشع احساس ممكن تعيشه.
هذا الإحساس ما يرحم اذا ثار! يخليني اتألم نفسيا.
يثير كل مخاوفي من الوحدة وابتعاد الناس عني ورفضهم لي، ويسرق بسمتي وفرحتي.
ويذكرني بعيوبي، واخطائي، والفروقات الي بيني وبين الناس، ويفقدني ثقتي بنفسي.
كمية الألم الي اعيشها بسبب هذا الإحساس، تخليني اجزم انه من اقبح وابشع الاحاسيس الي تمر علينا كبشرعامة.
آخر مره حسيت فيه كان بسبب موقف صار لي بالدوام.
كنت رايح للدوام متحمس لاني قربت اخلص التقرير الغثيث، الي جنن القسم كله ولا احد قدر ينجزه.
كنت ناوي اجلس مع مديري واسأله عن بعض الأمور قبل انجز التقرير بشكل نهائي.
دخلت مكتبي وجهزت كل شيء، وجلست انتظره يمر من قدام مكتبي.
أسلوب مديري معي متحسن كثير مؤخرا، و انا حريص اني اثبت له ان معاملته الحسنه لي ما راحت عبث.
مرت ساعه.. ما زلت انتظره.
مرت ساعتين.. وانا ما زلت انتظره!
مرت ساعتين ونص.. سمعت خطواته وفزيت اركض ابغى اعترض طريقة لكن للأسف طلع زميلي. ضحكنا شوي ثم راح بعد ما قال لي ان مديري ما راح يداوم هذاك اليوم، ولا الي بعده، ولا اللي بعده.
رجعت لمكتبي متحطم ومكسور.
لو ما صار هذا الموقف المحرج مع زميلي ما كان عرفت ان مديري في اجازه 3 أيام! كان ظليت انتظره من اول الدوام الى نهايته، يحرقني الانتظار بالوقت الي هو يمكن يكون نايم او مسافر ولا حتى جيت على باله.
عجزت افهم الي صار. ليش ما قال لي انه بياخذ إجازة؟
توقعت ان علاقتنا حلوه ومتحسنه. حتى اني من شدة احترامي له طقيت صدري واخذت اغث واصعب تقرير، انتفخت عيوني من شاشة الكمبيوتر وانكسر ظهري من الجلوس حتى انجزته.
طيب ليش زميلي يدري وانا ما ادري؟ معقوله ما يشوفني شيء؟ او ما يحترمني؟
حسيت ان مالي قيمة ما فيه تفسير ثاني للي صار.
مر هذاك اليوم وانا فيني غصة ماني قادر اطلع من عقلي واوقف أفكاري. جزء مني يدور له اعذار وتبريرات عشان اخفف الألم الي احسه من شعوري باللاقيمة، والجزء الاخر يتسائل وش العيب الي فيني الي يخليني كذا مالي قيمة.
الحقيقة ان العيوب في شخصياتنا وتصرفاتنا مستحيل تخلينا نحس بأن مالنا قيمة.
الناس الي حولنا كلهم مثلنا عندهم عيوب ولهم اخطاؤهم وتصرفاتهم السيئة.
لكن مع ذلك شعورهم بقيمتهم ما يتأثر ولا يتغير.
هذا يثبت بأن شعورنا بأن مالنا قيمة ماله دخل بعيوبنا واخطاءنا او أي أسباب أخرى تنبع من داخلنا وانما له علاقة بمؤثرات خارجيه.
بعض الناس الي نعطيهم قيمة عاليه هم من يؤذوننا ويشعروننا بأن قيمتنا منخفضة.
لأننا نحبهم ونحترمهم صرنا لا شعوريا نعطي لرأيهم عنا موثوقيه عاليه ونصدق كل شيء يقولونه عنا ونفسر تصرفاتهم السيئة تجاهنا على انها خلل فينا حنا.
دائما لما يؤذوننا (ينتقدوننا او يصرخون علينا او يكذبون علينا او يخادعوننا او يتجاهلوننا او يستهينون بنا او يبتعدون عنا او يهملوننا.... الخ) نطوي كمومنا ونبدأ نفتش بداخلنا عن عيوب واخطاء ونقائص خلتنا نستحق هذي المعاملة.
بدلا من اننا نلومهم على تصرفاتهم السيئة وأذيتهم معنا صرنا نهاجم انفسنا ونفقد شعورنا بقيمتنا. وحتى نستعيد شعورنا بقيمتنا لازم نبدأ بأسهل الحلول.
الحل الأول حتى نستعيد قيمتنا المفقودة هو اننا نواجه المؤذي ونشرح له عن مدى الألم الي سببته لنا تصرفاته.
أحيانا بدون قصد نؤذي اشخاص نحبهم وننصدم بعد مده لما يقولون لنا، نتمنى انهم قالوا لنا من البداية حتى نوقف.
ليست كل أذية بسبب كره، بعض الاذية تكون بسبب جهل او نقص خبرة بالحياة اوعدم تفاهم بين الاطراف.
لذا دائما من الأفضل اننا بالبداية نحسن الظن ونبلغ المؤذي عن التصرفات الي تخلينا نشعر بأن مالنا قيمة ونعطيه فرصة يتعدل. نعطيه فرصه وفرصتين وثلاث واذا ما تعدل نضطر للحل الثاني.
الابتعاد النهائي عن المؤذي هو الحل التالي الأكثر منطقية.
هناك مقولة مشهورة اعتقد انها لعمر بن الخطاب يقول فيها: "اعتزل مايؤذيك".
الحياة قصيرة وحرام نقضيها مع ناس دائما يحسسوننا باللاقيمة. اعرف دائما ان لك حق انك تغادر أي علاقة بأي وقت تبي وبدون حتى تبرر لنفسك. اعرف أيضا انك دائما تستحق الأفضل. اعرف أيضا انك في الأخير راح تلقى الشخص الي يقدرك ويعلي شأنك.
استمرارك مع الشخص المؤذي له معنى واحد فقط وهو انك انت الي جالس تقلل من قيمة نفسك وتؤذيها، لذا الابتعاد النهائي هو الحل الافضل. لكن في بعض العلاقات يكون خيار الابتعاد معقد وصعب شوي مثل ام واب واخ واخت وزوج، وفي هذا النوع من العلاقات نضطر للحل الثالث.
إعادة تقييم المؤذي وإعطائه القيمة الي يستحقها هو الحل اذا ما كنا نقدر نبتعد بشكل نهائي.
ببساطة تزول قيمته العالية الي كانت تعطيه سلطة وتأثير علينا.
اهتم بنفسك وطورها وانشغل بأمور حياتك الخاصة ومع الوقت راح تلاحظ ان قيمة المؤذي انخفضت عندك لأنك اخترت نفسك وقررت الاهتمام فيها. راح تلاحظ ان تصرفاته ما عادت تؤثر بك او تثير إحساسك بأن مالك قيمة.
دائما حط كل الأشخاص في حياتك في أماكنهم الطبيعية، ولا تعطي احد يؤذيك وسبب لك الم وخلاك تشعر بأن مالك قيمة اكبر من قيمته الي يستحقها.